بقلم / محمد مختار
الخميس2026/7/23
في تقارير بتقول ان القوات الأمريكية نفذت عملية إنزال جوي لقوات في مناطق قريبة من النخيب غرب العراق في منطقة استراتيجية بتربط العراق بالسعودية وفي نفس الوقت تقريبًا خرجت تقارير وتصريحات منسوبة لقادة في الحرس الثوري الإيراني بتقول إن طهران بدأت هي كمان تستعد لعملية برية واسعة بهدف اقتحام والسيطرة على القواعد الأمريكية الموجودة في العراق والكويت والبحرين يعني احتلال مقنع للخليج
بس عشان نفهم إحنا وصلنا للنقطة دي إزاي لازم نرجع كام ساعة لورا خليني أحكيلك أيه اللي حصل في آخر 48 ساعة ونربط الخيوط كلها ببعض عشان تفهم تفاصيل الوضع واحنا داخلين على أيه امبارح العجل البرتقالي خرج بتهديد جديد ومباشر لإيران وقال إن من اللحظة دي كل سفينة تتعرض لهجوم وهي بتعدي من مضيق هرمز أمريكا هترد عليها بضرب وتدمير جسر أو محطة كهرباء أو منشأة حيوية داخل إيران طيب ده معناه أيه معناه اننا كده خلاص دخلنا في مرحلة التخريب الممنهج للبنية التحتية وان الحرب اتحولت من مجرد مواجهة عسكرية بين جيشين لحرب استنزاف مفتوحة ممكن تضرب حياة عشرات الملايين من المدنيين في المنطقة كلها
والمفاجأة إن الرد على تهديد ترامب مجاش من إيران بشكل مباشر بل جه من اليمن بعد تصريحات ترامب بساعات قليلة الحوثيين أعلنوا فرض حصار بحري شامل على السعودية وقالوا إنهم هيمنعوا السفن السعودية من المرور عبر البحر الأحمر ومضيق باب المندب وده طبعًا ردًا على قصف السعودية لليمن من كام يوم وردًا على الحصار السعودي لليمن اللي بقاله سنين طويلة المهم ان التهديد ده المرة دي مكانش مجرد تهديد إعلامي الحوثيين بعدها أعلنوا بالفعل عن تنفيذ عملية استهداف ناقلتي نفط سعوديتين هما ENCELA و LAYLIA باستخدام صواريخ باليستية بحرية، وصواريخ كروز، وطائرات مسيرة انتحارية وبحسب بيانهم الهجوم أجبر الناقلتين على التراجع وتغيير مسارهم ومعاهم حوالي 10 سفن تانية فضّلت ترجع ناحية قناة السويس وهنا المشهد أصبح شديد الخطورة بالنسبة للسعودية ليه لأن صادرات النفط السعودية كده بقت مهددة من ناحيتين في نفس الوقت مضيق هرمز في الشرق واللي إيران بتهدد حركة الملاحة فيه وبتستهدف السفن اللي تعتبرها مخالفة لتعليماتها وباب المندب في الغرب واللي الحوثيين فرضوا عليه حصار بحري ضد السفن السعودية
يعني دلوقتي حتى لو السعودية حاولت تتجنب هرمز وتصدر نفطها من البحر الأحمر فهي دلوقتي بتواجه تهديد تاني في باب المندب والمشكلة إن في الحروب البحرية مش لازم الصاروخ يغرق السفينة فعلًا عشان يوقف الملاحة في أي ممر استراتيجي مجرد إطلاق صاروخ أو مسيرة ناحية ناقلة نفط حتى لو أخطأت هدفها ممكن يكون كافي عشان شركات الشحن توقف المرور وشركات التأمين ترفع أسعارها بشكل جنوني والناقلات تغير مسارها وأسعار النفط تبدأ تزيد
️وده بالفعل اللي حصل بعد الهجوم على السفينتين السعوديتين سعر خام برنت ارتفع ووصل لحوالي 95.47 دولار للبرميل وحاليًا العالم كله رجع تاني لنفس القلق من إننا في خلال الأيام اللي جاية هنلاقي المضايق الاستراتيجية كلها في المنطقة اتقفلت طب أمريكا سكتت ع الكلام ده لأ طبعًا بعد اللي حصل ده مباشرة القوات الأمريكية شنت ضربة على منفذ الشلامجة الحدودي بين العراق وإيران المعبر في الوقت ده كان مكتظ بالمسافرين والزوار وخصوصًا زوار العتبات الدينية المتنقلين بين البلدين وبحسب السلطات المحلية في محافظة خوزستان الإيرانية الضربة استهدفت المنطقة المحيطة بصالة الركاب داخل المنفذ وتحديدًا استراحة أو موقع تابع للشرطة الإيرانية داخل المعبر الحصيلة الأولية للضربة دي كانت سقوط 3 ضحايا مدنيين وإصابة حوالي 11 شخص وفي الوقت اللي الضربة والضحايا كانت الخارجية الأمريكية أصدرت تحذير عالمي شديد اللهجة للمواطنين الأمريكيين في المنطقة التحذير قال إن الوضع الأمني في الشرق الأوسط بقى شديد التعقيد وإن في احتمال لتصعيد مفاجئ وغير متوقع وطلبوا من المواطنين الأمريكان الموجودين في المنطقة إنهم يلتزموا بأقصى درجات الحذر ويستعدوا لإلغاء الرحلات الجوية وإغلاق المجالات الجوية وتعطل السفر بشكل مفاجئ الأخطر إن البيان قال إن إيران والجماعات الداعمة ليها ممكن تستهدف مصالح أمريكية خارج الشرق الأوسط كمان بما فيها السفارات والمنشآت والشركات والمؤسسات المرتبطة بالولايات المتحدة في مختلف أنحاء العالم وفي وسط كل ده أمريكا كانت بالفعل شغالة في واحدة من أوسع حملاتها الجوية على إيران من وقت عودة الحرب لليوم الـ 12 على التوالي عشرات المقاتلات الأمريكية طلعت عشان تنفذ هجمات وضربات جوية مباشرة من بينها مقاتلات F-35A الشبحية ومقاتلات F-16 وطائرات F-15E الهجومية وكلها مدعومة بطائرات الإنذار المبكر والسيطرة E-3 Sentry بالإضافة لعدد كبير من طائرات التزود بالوقود المنتشرة في السعودية والإمارات وإسرائيل وخلال ساعات قليلة الضربات طالت ما لا يقل عن 8 مدن ومناطق إيرانية الهجوم وصل لتبريز في شمال غرب إيران ومعاها بوشهر على ساحل الخليج وتشابهار في الجنوب الشرقي وخرم آباد غرب البلاد وأصفهان في العمق الإيراني وشيراز جنوب إيران ومهاباد في الشمال الغربي وبندر جاسك في محافظة هرمزغان الضربات دي بحسب الإعلام الأمريكي وبيانات القيادة المركزية CENTCOM استهدفت منشآت بحرية ومخازن صواريخ ومواقع طائرات مسيرة ورادارات مراقبة ساحلية ومنظومات دفاع جوي ماذا فعلت إيران من ناحيتها ما اكتفتش بضرب القواعد الأمريكية في المنطقة سواء في الأردن أو الكويت أو البحرين أو المناطق العسكرية الأمريكية في العراق عشان هما خلاص خرجوا معظمها من الخدمة بالفعل المرة دي للأسف الهجمات الإيرانية أصبح جزء منها كمان موجه ناحية البنية التحتية للكهرباء والطاقة في الكويت ومن يومين وزارة الكهرباء والماء والطاقة المتجددة الكويتية أعلنت خروج خطوط فرعية من محطة التحويل الرئيسية في منطقة حطين مع انقطاع الكهرباء عن أجزاء من المنطقة بسبب الاستهدافات الإيرانية بالمسيرات ومع استمرار الأعطال بدأت تظهر مشاهد نادرة جدًا في الكويت لمولدات كهرباء ومحطات طاقة متنقلة بيتم نقلها وتشغيلها عشان تعوض العجز الناتج عن خروج أجزاء من الشبكة عن الخدمة وكل التطورات دي بتوصلنا للنقطة الأخطرهل أمريكا فعلًا بدأت تحضر لغزو بري لإيران من ناحية العراق؟
التقارير اللي اتكلمت عن إنزال أمريكي قرب النخيب لسه غير مؤكدة رسميًا ومصدرها الأساسي منصات عراقية ومنصة صابرين نيوز على التيليجرام اللي قالت إنها نقلت الكلام عن مصادر خاصة لكن لو صح الخبر، فـ مكان الإنزال المزعوم مهم جدًا لو بصيت ع الخريطة هتلاقي ان منطقة النخيب دي موجودة في الصحراء الغربية لمحافظة الأنبار وقريبة من طرق بتربط العراق بالسعودية وبتوصل لمناطق الأنبار وكربلاء وبغداد ولو في قوات خاصة أمريكية بتتحرك فعلًا في المنطقة دي فده ممكن يكون هدفه تأمين طرق إمداد أو حماية قواعد أو تنفيذ عمليات استطلاع أو التحضير لتحرك أكبر قرب الحدود الإيرانية وده ممكن يكون مرتبط بقصف أمريكا للمعبر الحدودي امبارح في الشلامجة وفي المقابل في حاليًا تصريحات منسوبة لقادة في الحرس الثوري بيقولوا إن إيران بدأت تستعد بالفعل لتنفيذ عمليات اجتياح برية هتستهدف القواعد الأمريكية في العراق والكويت والبحرين بدعم من حلفائها والفصائل المسلحةالموجودة داخل العراق نفس مشاهد حرب الخليج الأولى للأسف أمريكا شكلها عايزة تحارب إيران من داخل العراق والكويت والبحرين وإيران هتدخل الدول عشان تحارب القوات الأمريكية والمدنيين والبنية التحتية والجيوش المحلية هما اللي هيدفعوا الثمن
والمشكلة الأكبر إن المشهد ممكن يتعقد أكتر بسبب تركيا وفي تقارير منسوبة لمسؤولين إسرائيليين كبار قالت إن أنقرة خلال الأيام اللي فاتت حذرت من إنها ممكن تقدم دعم جوي لإيران لو القوات الكردية شاركت في اجتياح بري للأراضي الإيرانية ضمن عملية تهدف لإسقاط النظام الإيراني
طب ليه تركيا أصلًا بتتدخل
عشان تركيا عندها حساسية شديدة جدًا من أي توسع عسكري كردي قرب حدودها وبتعتبر إن تمكين جماعات كردية مسلحة داخل إيران ممكن يتحول بعد كده لتهديد مباشر للأمن القومي التركي وعشان كده، دخول قوات كردية ضمن أي غزو بري لإيران ممكن يدفع تركيا للتدخل مش حبًا في النظام الإيراني لكن خوفًا من قيام كيان كردي مسلح جديد على حدودها وساعتها هنكون قدام مشهد شديد التعقيد أمريكا وقوات كردية من ناحية وإيران وحلفاؤها من ناحية تانية وتركيا بتقدم دعم جوي لإيران وإسرائيل مستنفرة وبتستعد لأي صواريخ ودول الخليج قواعدها وبنيتها التحتية تحت النار وده تقريبًا شكل حرب عالمية مصغرة بتدور في مساحة جغرافية صغيرة جدًا
