دي بداية ما تسرش
ولسه ع الأبواب
مين فينا ما انضرش ؟؟
وقلبه ما اضطرش
يبعد عن الأحباب
💌
مين دمعه مش سايل
على قريب وغريب
مين مِنا مش شايل
الهم و اتحايل
على الأمل ما يغيب
💌
زمن السعادة خلاص
راح ويا راحة البال
ما بقاش دهب ولا ماس
ينفع يغير حال
💌
كاس المرار داير
على البشر بالدور
زاد الوبا وثاير
وبيسأل الحاير
فين يلقى طاقة نور
💌
كل اللي باقي دموع
جوه العيون ساكنه
وكلنا ف موضوع
والخوف أهو مسكنا
💌
من ألف شيىء مجهول
له سيرة وحكاية
خوف يلتهمنا الغول ؟؟
خوف من مطر و سيول
خوف يصدق اللي يقول دي قيامة ونهاية
💌
باللهِ تهدي يا عام
وتكون علينا حنون
رحبنا بيك بسلام
قولنا اللي فات مجنون
💌
طب ليه بتشبه له ؟؟
ف الطبع والصورة
لسه البعيد أهله
م الشوق بتنده له
وقلوبنا مكسورة
__________
بقلمي الشاعرة زينب شبل ١٦/١/٢٠٢١
