اللى زعلان من العيشه
ولا ارتفاع الاسعار
غاز كهربا وميه
زيت ويا سولار
لحوم خضار وفاكهه
ولا سعر الدولار
حياه بقت صعبه
والحاجه مولعه نار
ماتزعل نفسك والله
ما تفكر ولا تحتار
خد بعضك وسيبها
وعلى دول الجوار
السعوديه شدت حزامها
وحدت من الزوار
الكويت جت حصلتها
ورفعت كل الاسعار
خد بعضك على سوريا
اهلها فاتولك الدار
حطام مبانى تلاقيها
وكل شىء منهار
جابوا عاليها واطيها
والحال فى انحدار
خراب دمار حواليهم
مرنزقه خونه وكفار
طب ميل على ليبيا
قتل فى عز النهار
واليمن ياحسره عليها
بياكلوا ورق الاشجار
شوف الحال فأوربا
حابسنهم جوه اسوار
خيمه لاكثر من عيله
ووجبه لطول النهار
سجن فأرض غريبه
بعد م كانوا احرار
أحمد ربك ياسيدنا
لك عمل ولك دار
بلاد كتير تحاربنا
عايزنا يوم ننهار
بس جيشنا ساندنا
وموفر عيش وخضار
وكل حاجه تلاقيها
ماتدقش فالاسعار
وعكه بنمر بيها
وجشع من التجار
يارب بلدنا احميها
من خونه واشرار
ودومها علينا نعمه
وامن واستقرار
والخير يعم علينا
بالعمل ليل ونهار
ونسيبها كده لولادنا
فى فخر وازدهار
