أحمد الجارحي
جملة اتكررت كتير بس حقيقي مش حاسين بمعناها، العالم ما قبل الكورونا يختلف تمامًا عن العالم بعدها.
مع بداية إنتشار الڤيروس وقفل أغلب أماكن الشغل والدراسة ظهرت موجة بتقول للناس استغلوا الوقت دا كُويس ومتضيعوش الوقت وظهرت موجة مضادة بتقول للناس مش لازم تتعلم ٩ لغات وتخلص ١٨٠ مشروع وتاخد ماجستير ودكتوراة في فترة الحظر واستمتع بالحياة في هدوء والحقيقة إن لو كان الوضع كام يوم ويخلص كان هيبقى الرأي التاني أجمل وأحلى وتكون فرصة للاسترخاء ولكن..
النهاردة يبدو إن الناس هتضطر سواء بمزاجها أو غصب عنها تتأقلم مع الواقع الجديد، مفيش حاجة تقريبًا هتفضل على حالها.
الشغل اتغير والتعليم اتغير والكورة اتغيرت…
جامعة كامبريدج -واحدة من أعرق وأكبر وأهم جامعات العالم- بتعلن النهاردة إن العام الدراسي الجديد بالكامل هيكون online لحد صيف 2021!
خبر زي ده مش بعيد نسمعه في مصر قريب، ودا معناه إن الهروب من التعليم online رغم عيوبه مش هينفع يبقى حل بالعكس هيبقى دا هو العادي!!
كلمتين أبرك من ١٠: دور على شغل يناسب الوضع ده أو اعمل مشروع تستفيد فيه من الأزمة وكمل خطط تعليمك online واللي عنده معزة يربطها والسلام عليكم ورحمة الله وبركاته
