كتبت اسراء عتابي
هتمر علينا لحظات نحس فيها إننا خسرنا حاجات كتير
اووي، هيمر علينا وقت نحس ان الدنيا والناس وكل شئ حوالينا ضدنا هنوصل لمرحلة صعبه جدا من الضيق والزعل والخنقة اللي ممكن توصلنا لأكتئاب لان مفيش حد حاسس بينا وباللي بنمر به،، أن اللي حوالينا مش حاسين بوجعنا وتعبنا،، هنحس وقتها اننا لوحدنا وتايهين،،
بنتخبط في كل شئ وأي شئ مفيش تركيز مفيش تفكير دماغنا برغم كل اللي فيها مشتته ملناش نفس نعمل اي حاجه ولا حاسين بفرح ولا حتى حزن كل شئ بقى شبه بعضه وكأن حياتنا وقفت!!!
بس في وسط كل ده وبرغم كل الزحمه دي واللخبطه اللي بنكون فيها وحالة اليأس اللي بتبقى مسيطرة علينا،، بنلاقي شئ جوانا بيقولنا بصوت ضعيف ؛
استنوا شويه اصبروا حبه احتمال شئ يتغير،، طيب يمكن لسه في امل في بكره يمكن الدنيا تتحسن ،،
الصوت الضعيف دا شعاع النور اللي جوانا اللي برغم اليأس والضلمه ربنا بيزرعه فينا،، الشعاع ده لازم نتعلق بيه ونكبره ونخليه ينور أكتر نخليه ينطق بصوت عالي ويصرخ ويقتل كل كراكيب الحزن جوانا ويمحي أي ضلمه ويأس بيسيطر علينا
علشان كده مهما مر عليكم من يأس وحزن وضيق وعدت عليكم ازمات اوعوا تطفوا الشعاع اللي جواكم حتى لو بسيط اوعوا تستسلموا للضلمه،، 👀💜
