“حقك عليا زوجتى الحبيبه” بقلم: صابر البحيري

حقك عليا زوجتى الحبيبه

عايشه معايا بقالك سنين ودايما فى تعب ومشاكل لاحصر لها
كنا نفرح شويه ونزعل شويتين لايوم زهقتى ولايوم سبتى البيت ومشيتى

أنا كنت دايما متكبر ومعنديش احساس بمشاعرك الجميله ودايما ماكنتش بسمعك ولا اقعد معاك أنا عارف انك كنت محتاجه لصدرى تترمى فيه لكن انشغالى كان دايما شاغلنى عنك

حتى الأولاد أنا عارف انى كنت مقصر فى حقهم لايوم قعدت معاهم ولا اتكلمت عن مشاكلهم وكنت انتى بالنسبة ليهم الاب والام وكنت اشوفك بتذاكرى ليهم وانا قاعد ولا فى دماغى

استحملتى عذاب قسوتى وعنادى فى تصرفاتى ودايما كنتى بتدافعى عنى مع كل الناس وماكنتيش تسمحى لأى حد يتكلم عنى كلمه مش كويسه

صدقينى غصب عنى مشاغل الحياة والحمل التقيل خلانى مش عارف اعمل ايه لدرجه انى كنت بغلط فى شغلى وساعات كتير كنت بخسر اى شغل بمشى فيه وبرجع للصفر من تانى

وعرفت دلوقتى فى بعادك أنا ليه كنت بخسر ودايما فى النازل لانى ماكنتش صريح معاك وكنت بخبى عليك ومش عايزك تعرفى عنى اى حاجه
فى بعادك عايش ماليش اى قيمه ماليش ذكرى ماليش وجود

اتعلمت وعرفت أن الحياه من غيرك مالهاش طعم ولا ريحه
وعرفت انى كنت انسان ماليش قلب ولا احساس
حسيت دلوقتى انى ضيعتك وضيعت احلى سنين من عمرى

وكنت انانى مش بحب غير نفسى وبس
دلوقتى بس اتاكدت انى بحبك ايوه بحبك ومقدرش اعيش من غيرك لانى من غيرك اموت
حتى الموت خساره فيا صدقينى

عايش ومش عارف النهارده ايه ولابكره ايه كل الايام زى بعضها
مافيش حاجه حلوه فى حياتى يبقى اعيش ليه ولمين
عايزك تسامحينى وتدينى فرصه أكفر بيها عن كل يوم عدا عليكى حزينه

وعدا عليكى ودموعك على خدك .. سامحينى يااجمل قلب ويااحن انسانه فى الوجود

سامحينى لانى كنت غلطان وماكنتش عارف قيمتك
ودلوقتى بس عرفت انتى ايه بالنسبه ليا
انت الحياه والوجود انت الامل فى بكره انت الحب اللى هاعيش علشانه ودايما هاحافظ عليه

صدقينى اتعلمت وعرفت انى من غيرك ماليش قيمه ماليش وجود الكل سابنى وبعد عنى عشانك
لانهم عارفينك ومقدرينك
حبيبتى وام عيالى ارجوكى محتاج فرصه تانيه علشان

ااقدر اكمل مشوارى معاك
وصدقينى لو رفضتى ليكون ااقرب حاجه ليا الموت
ارجوكى سامحينى
سامحيني