عاتب عليك يا زمن
فيك اكل الحقوق حرفه
ومليييون طريق للغش
الكل يلعب على الحبال
اساتذه فى لبس الوش
فقير لو شك فى لقمته
الليل يسهره مينمش
وغنى ياكل ولا يسمى
المهم يعبى الكرش
حرامه ياكل حلاله
وبرده ميتعلمش
خلى عشمك فى اللى خلقك
فى الخلق متتعشمش
وعاتب ابن الاصول يقدرك
وعلى قليل الاصل ماتعتبش
ابن الاصول بميزان الدهب وزنه
وقليل الاصل وزنه القش
ياكل فى عيشك وملحك
ويضحك يدوب فى الوش
حتى لو تقلت حمولك
اثبت متستسلمش
على قد غطاك مد رجلك
وبالسر للئيم متبوحش
وسط الرجال اوزن كلامك
وغير الحق كمان متقولش
ولو كان عليك الحق
قول غلطان ومتتكسفش
عاشر اصيل معاه تعلا
وسيبك من الواطى عشرته متدومش
لو حتبكى ابكى لوحدك
على خد غيرك الدمعه مبتنزلش
متخافش من عيون وكلام
دا عين المولى مابتنمش
وحسبك الله فى دعوتك
عادل مطلع ومبيظلمش
بقلم محمود الكومى
