كتب : أديب سلامة
على ارتفاع مذهل يصل لحوالى 2285 متر فوق مستوى البحر، الموقع المقدس له مكانة كبيرة فى قلوب عدد كبير من الناس ينتموا لكل الديانات السماوية.
جبل موسى كمان هو مكان لدير وكنيسة سانت كاترين اللى تم اكتشافها فى القرن السادس ميلادي. المنطقة دى كمان شهدت معجزة ربانية ثانية وهي كلام الله لسيدنا موسى.
ناس كثير سواء كانوا كبار أو صغيرين بيسافروا من كل مكان لمجرد الوقوف فى البقعة المقدسة. وقت رحلتنا، قابلنا ناس من كوريا وإندونيسيا حضروا لسيناء لزيارة الأماكن المقدسة.
قابلنا السائق الخاص بنا عند الفندق حوالى الساعة 7مساءً فى شرم الشيخ، ووصلنا لسفح الجبل مع المرشد السياحى اللى سلٍّم كل منا كشّاف إضاءة ونبذة مختصرة عن رحلتنا.
لازم تعمل حسابك أن الرحلة دى مش لأصحاب القلوب الضعيفة، كونها تشمل تسلق الجبل لعدد من الساعات فى الظلام وكل اللى معاك كشّاف وشنطتك الخاصة، لكن على العموم تقدر تمشى على حسب سرعتك وتتوقف للراحة كل ما تحتاج.
ينصح كمان بارتداء ملابس ثقيلة، لأن درجات الحرارة بتتغير بشكل ملحوظ ومفاجئ، الجو كان برد بشكل رهيب أثناء طلوعنا بالليل، لكن مع نزولنا الشمس كانت شديدة جدًا والحرارة مرتفعة.
على كل حال، التجربة فعلاً كانت لطيفة. اكتشفنا أنك تقدر تركب جمل على الجبل، بتكلفة إضافية طبعًا، تختلف على حسب قدرتك على الفصال مع البدو. المرشد السياحى كمان بيقول نفس الكلام باللغتين العربية والإنجليزية.
عملية تسلق الجبل بتستهلك معظم الوقت والمجهود، لكن أول ما توصل القمة هيقابلك منظر رائع كون الشمس بتكون لسه بتشرق وده يوفر فرص رائعة لالتقاط صور جميلة، بجانب إحساسك أنك عملت إنجاز عظيم. كمان فيه يافطات بتوضح المناطق اللى تلقى فيها سيدنا موسي الوصايا العشر على قمة الجبل.
على قمة الجبل، هتلاقى كمان خيام بدوية متنوعة تقدر تشترى منها مشروبات ساخنة وباردة وأكلات خفيفة، وكمان تأجير بطاطين لو حبيت تستمتع بقيلولة سريعة بعد رحلة التسلق الشاقة