..عايزنا نرجع زى زمان..
مين مايحبش الاصاله الزوق والروقان
أغانى جميله وحلوه طرب والحان
يتلم ولاد الحته حبايبنا والجيران
كلام جميل وهادى كله رقه وحنان
كله حب وموده بالصحبه والخلان
أحمد جرجس وشحته مينا وشعبان
والقاعده عالحصيره والمزاج خرمان
نولع الجوزه ونحبس بكام فنجان
والحكاوى تحلى وتكتر بمجيه الجدعان
والضحكه صوتها يعلا تصحى الجيران
والسهره تطول وتحلى نسمع فجر الاذان
ندعى سوا بقلوبنا لرب واحد ديان
ينعم بفضله علينا بالحب والايمان
أيه جرى فالدنيا أتقسمت الوان
زمن المحبه أختفى وياعينى عالانسان
راح ضحيه بشر ما كانوا فالحسبان
خلوا العقل ابتلى وراح ف التوهان
ملوا دماغنا بفتاوى غيبوا الجدعان
كانت النتيجه بلاوى وخراب فكل مكان
الاخ يقتل اخوه ويكبر بالرحمن
مصيبه وحلت علينا وذاد بنا الجنان
راح زمن المحبه الطيبه والحنان
راح من افعالنا الامن والامان
على رأى سومه ورامى الفنان
عايزنا نرجع زى زمان
قول للزمان ارجع يا زمان
