كتب : محمد عتابي
” أبغض الحلال “
الطلاق.. أسبابه.. تأثيره على المجتمع
عندما زادت نسب الطلاق في الأزمة الأخيرة. لاحظت أن أحد الأسباب التي تؤدي إلى الطلاق وهي ” عدم طاعة الزوج “
تلك الظاهرة الموجودة في بنات تلك الأيام و تقريبا المشاكل بتزيد و نسب الطلاق بتزيد بسبب النقطة دي
من غير لف ولا دوران .
. في كتير من الزوجات دلوقتي .. السوفت وير بتاعها نازل من غير الفايل بتاع ( طاعة الزوج) .
الزوجة دي معترفة أن أي منظومة في الدنيا لازم يكون ليها قائد … والقائد ده بيتسمع كلامه (طبعا في ظل أسس مؤسسية معينه) .
.. ومعترفة أن أي مركب لازم يكون ليها ريس.. ما عدا البيت .. هي شايفة انها مش لازم تسمع كلام حد وانها ماينفعش تعمل أي حاجة من غير ما تكون مقتنعة ..
رغم انها بتسمع كلام مديرها في الشغل عادي حتي لو هي مش مقتنعة لان ده طبيعي في العمل المؤسسي .. بس جوزها لا.
والامثلة كثيرة ومتعددة ..ولو الراجل ومراته إختلفوا علي حاجة
وهما بره البيت فالتصرف السليم أن الزوجة تحترم رغبة زوجها في اللحظة دي (حتي لو مش مقتنعة) ولما يرجعوا البيت يناقشوا الموضوع بهدوء .
انا شوفت فيديو لبرنامج المذيعات فيه مصريات .. كانوا مستضيفين ست سورية .. الست السورية بتتكلم أنها اتربت علي طاعة الزوج .
. يعني بتسمع كلام زوجها وانها لازم تحترمه .. وبتختار الكلام اللي بتقولهوله احتراما ليه .. وانها لازم تميزه وهي بتوزع الاكل
.. وانها لازم توفرله سبل الراحة لما يرجع م الشغل .. المذيعات كانوا مستغربينها جدا وكانوا هايقوموا ياكلوها .
الشريحة دي من الزوجات نشأت لأسباب مختلفة .. منها .. انها ممكن تكون اتربت في بيت الام هي اللي كانت مسيطرة علي البيت
.. او لانها تأثرت بالافكار بتاعة رابطة الاسترونج اندبندنت وومن .. او شعورها بالاستقلال المادي حسسها انها زيها زيه
وانه مالوش عليها حق الطاعة .
واللي ساعد علي كده ظهور رجالة ضعاف الشخصية فالست بتضطر تاخد مكانه .
البنت دي هتلاقي قاموس اللغة بتاعتها مليان بكلمة ( لأ … انت مالك … مش مقتنعة … أنا مش جاموسة بتسحبها
… انا حرة … انا كده واذا كان عاجبك … اشمعنى انت .. الخ)
طبعا الطاعة دي مش مطلقة وليها مفهوم وضوابط .. وطبعا ما انكرش أن في رجالة مستبدين .. وانهم بيسيئوا استخدام
حق الطاعة .. لكن ده مش معناه اننا نهدم المبدأ من الأساس .
في الحياة الزوجية .. الزوجة واجب عليها الطاعة بالمنطق المؤسسي وبالادلة الشرعية
.. زي ما الزوج واجب عليه الرفق والرحمة بمن هم تحته .. أي طرف بيتخلي عن واجباته .. البيت بيحصله خلل رهيب
قال صلى الله عليه وسلم : ألا أخبركم بخير ما يكتنز المرء ؟ المرأة الصالحة ؛ إذا نظر إليها سرته ، وإذا أمرها أطاعته ، وإذا غاب عنها حفظته .. رواه أبو داود والحاكم
