كتب /أيمن بحر
اللي أشتغلوا في حفر قناة السويس الجديدة ، واللي قاموا بشق جبل الجلالة ، واللي قاموا ببناء كوبري تحيا مصر اللي حضرتك
فرحان بيه وبتتصور عليه أنت وأسرتك كانوا شباب مصريين مش شباب من بلد تانية .
المنتجات الغذائية اللي بتنتجها مصانع المواد الغذائية وحضرتك بتاكلها بيشتغل فيها عمال شباب مصريين .
الخضار والفاكهة اللي بتاكلهم بيزرعهم شباب مصريين من الأرياف .
اللي أشتغلوا في بناء الوحدات السكنية الجديدة اللي أتعملت لأهلنا سكان العشوائيات برضة شباب مصريين .
اللي بيشتغلوا في المشاريع القومية الجديدة عموماً اللي بيتم إنجازها بمنتهي السرعة والإتقان عمال شباب مصريين .
اللي بيستقبلك في المستشفي في وحدة الأستقبال لما بتتعب باليل وبيقدملك كل الرعاية طبيب مصري شاب .
البطولات اللي أنت شوفتها في سينا وبتتحاكي بيها بمنتهي الفخر كانت من شباب مصريين زي الشهيد منسي والشهيد
أيمن شويقة ، والأبطال اللي داسوا بدبابتهم علي السيارة اللي جاية تهاجم الكمين كانوا شباب مصريين مهربوش وسابوا بلدهم زي غيرهم في عز أزمتها وفي عز إحتياجها لهم .
الكلام ده علشان الناس اللي أثناء دفاعها عن شباب بلد تانية بيقوموا بالتعميم وبيقللوا من شأن شباب مصر اللي خرج منهم أبطال هنفضل نتحاكي ببطولاتهم وبفضلهم علينا طول العمر .
