الفاتحة على روح ست الحبايب رمز الحب والحنان الحاجة بسمة عبد الحميد عيسى امي الحبيبة
أمممممممممممممممممممممممممي
سبتيني في الدنيا غريبه
أمي الحبيبة غايبه لكن حاضرة
يا قلب الطيبة وحشتيني
يا نبع الحنان
يا جنة الرحمن كانت على أرضه
حضن الأمان والبسمة على شفايفي
في لحظة بينادي المؤذن لصلاة
العصر قمتي بسرعه اتوضيتي
وبكل حب واشتياق للقا هميتي
قمتي تصلي وتشكري ربك ودعيتي
ليا ولكل أخواتي ما خليتي
جبينك من الوضوء عليه النور
تجري عليه المايه كما الندى
على خد الزهور
صوت دعاكِ وانت بتفردي سجادتك
ووشك البشوش ونور ابتسامتك
بسمة جميلة بتنور وشك
وفرحتك وانت بتلبي ندا ربك
حبيبتي يا أمي ياحجه بيت الله
ماكنتي تعرفي إنها أخر صلاة
وانت ساجده فاضت روحك للإله
طولتي يا أمي في السجود
ماكنت اعرف انك غبتي عن الوجود
اشتاق ربي للقائك والملائكه شهود
من حب ربنا رزقك بحسن الخاتمة
وروحك فاضت لرب السما
لو كنت اعرف انك خلاص مسافره
كنت مافارقتك لحظة يا غاليه
وفضلت تحت رجليك ومش فارقه
كد وشقى في الدنيا تعب ومعافره
وافضل بس وياك يا واخده القلب ومفارقه
مشتاقه ليك يا أمي ولضمتك
صدري ووداني تسمع نبض قلبك
يااااه على راحة البال وانا في حضنك
لحظة تساوي الدنيا وانا جنبك
من بعدك بيت العيله بقى خراب
بقوا الاخوات عن بعضهم اغراب
حتى الحمام في الغيه هجر عشه
ومكانه عشش فيه ….. الغراب
ديما في كل مكان بسمع صوتك
ضحكتك همسك حتى سكوتك
كل حته رحتيها بشوف طيفك
دعاك ليا فرحتك بيا حتى خوفك
فكراكِ مش بانساكِ وديما على بالي
اما كنتِ بتجيلي وشايله الدنيا في اديكِ
وفرحتك وانتِ بعنيكِ شفتي عيالي
ولمتهم حواليكي ويبوسوا اديكِ
بس فرحتي كانت أكبر بكتير منهم
لاني كنت باشعر اني لعطفك وحنانك
لسه محتجالك وفي قربك انا اصغر منهم
لسه دموعي على خدودي مغرقاني
كأنك لسه على سجادة الصلاه قدامي
هتسلمي وتقومي معايا تتكلمي
وهتسأليني وعن احوالي تطمني
لسه مش مصدقه بنتك الصغيرة
بقت زوجه وام وعليا تضحكي
وتقوليلي بتعرفي يا حنان توكلي وتشربي
وبتصحي من عز نومك على ولادك تشقري
ومن بدري تقومي تغسلي وتفطري
وتلبسي وتسرحي ولمدارسهم توصلي
أيوا يا أمي بعمل زي ما كنتِ ليا ولاخواتي بتعملي
يا قلب الحنان يا سر الوجود
بفتكر زمان ولمتنا بتمناها تعود
اخواتي بنات وصبيان بقوا جدود
بس مش في حنانك اللي ماله حدود
كبرنا والدنيا فرقتنا وبقى بينا مسافات وسدود
بس فكرينك ولو مر العمر وسكنا اللحود
حتى انا كمان بقيت جده
بس لسه مانسيتك ولا حسه
اني كبرت……. ومحتجالك
ومش قادره
تعبت من شيل الهموم يا امي
ومين غيرك كان بيحمل همي
تطبطبي وتهوني وتسمي .. تدعي
وتقولي ربنا معاك يا بنتي
امي اجمل كلمة عشقها قلبي
امي من بعدك مافي شيء فاضلي
ليه سبتيني ياللي ترابك كحل لعيني
وطيفك في بالي ما اسيبه ولا يسيبني
سبتيني وفارقتي يا حبيبتي يا امي
#بقلم_حنان_محمدعبدالعزيز
