… تابع /أيمن بحر
روس عماله بتتقطع زي القناديل
لا القاتل عارف السبب ولا القتيل
مع كل ألف تسعمية قابيل وهابيل
والميه بيتفرجوا وشغالين تطبيل
…
غرايب ما شفهاش زمن أبوجهل
القتل بقى زي شرب الميه سهل
في الشارع وبين الأسره والأهل
ووصل للأب والأم بعد التعديل
…
وأول ما حد فجأه بسلاحه يتهور
والناس شايفه قدامها حد بيتعور
الكل يطلع موبايله علشان يصور
ومش هاممهم الدم اللي بيسيل
…
كل ثانيه تعدي بتحصل جريمه
وروح البني آدم مابقلهاش قيمه
الأخلاق ضاعت وصارت عديمه
وضاع كل شيء كان فينا جميل
…
وطول ما عن طريق ربنا بنتباعد
وفي انتشار الجريمه كله بيساعد
ومش هاممنا نِطلّع شباب واعد
حنشوف لسه مصايب وهواويل
…
وطول ما بياع المخدرات سايب
والضمير لسه بعيد مستتر غايب
حتبقى البلد مليانه بشباب خايب
والعيشه تتكدر بسبب المساطيل
…
طول ما الناس مش لربها طايعه
والمروءه بينهم أصبحت ضايعه
ومحدش قادر يلّم الخِلق الصايعه
أحوالنا كل مالها ما حتفضل تميل
…
وطول ما العُري يبقى فن هادف
والبلطجه تابعه الإبداع بالترادف
كتير جرايم في حياتنا حنصادف
ونمبر وان يعني خلاعه وتمثيل
