شهادة سائق تاكسي عن احوال الاقصر واللواء سمير فرج

متابعة عادل شلبي
دار حوار بيني وبين سائق تاكسي عند توجهي من المطار الي وسط مدينة الأقصر، سألت الرجل عن حياة الناس في الآقصر وامورهم المعيشية، قال الرجل : الامور ليست علي ما يرام منذ اكثر من اربع سنوات ، سألته عن معدلات السياحة بالمدينة ، فقال : السياحة لا زالت غائبة عن المدينة ، معدلات الاشغال لا تتجاوز عشرة بالمائة، وقال بأسي : احنا ٨٠ تاكسي نعمل في نقل الوافدين للاقصر من والي المطار، الواحد مننا بيعمل مشوار واحد كل ثلاثة ايام ، وانفعل وهو يكمل كلاموا : يعني انا اهوه اخر مشوار عملتوا من المطار كان يوم الجمعة ، وسألني : النهارده ايه ؟ ، قولت الاحد ، قال اهوه عشان تصدقني مشوار كل تلات ايام !
واضاف بأسي : الناس تعبت جامد اوي هنا في الاقصر، ومحدش بيرحم .. يعني الجزارين بيزودوا سعر اللحمة خمسة جنيه كل اسبوع من غير سبب ، يعني الكيلو كان بخمسة وخمسين جنيه من شهرين ، النهارده بقي بسبعين ، يعني اللي عاوز يعمل طبخة لولاده بكيلو لحمة واحد عاوز ٢٠٠ جنيه ، منيين ؟! ، واضاف : مش عارف فين بتوع التموين والرقابة عالاسعار ، مفيش حد بيعمل حاجة !
قلت : يعني الامور ما اتحسنش شوية من السنة اللي فاتت ؟
قال : لا والله يابيه !
قلت : طب ايه السبب وايه الحل ؟
قال : يابيه مشكلة الاقصر انها قايمة علي السياحة بس ، لا عندنا صناعة ولا تجارة ولا مصانع ولا اي حاجة ، اول ما السياحة تتعطل ، تتعطل حياة الناس !
قلت : طب والمحافظ ، ما بيعملش اي حاجة ، ممكن تساعد الناس في الاقصر ؟
قال : يابيه ، انا ما اعرفش عنوا حاجة وممكن يبقي راجل كويس ، انما احنا مش حاسين بحاجة عملها للبلد ، غير السور بتاع الكورنيش واشار الي سور الكورنيش الحديد ، اضاف : ماشوفناش محافظ للاقصر زي اللواء سمير فرج ، انا عندي خمسين سنة وفاكر كل المحافظين والمسئولين اللي جم هنا .. سمير فرج عمل انتعاش اقتصادي ونضف البلد ، وكان ناوي يكمل مشروعات كتيرة ، لخدمة الناس هنا ، انما بقي حصل اللي حصل بعد الثورة ، ووقفت كل حاجة !
واضاف : انا اعرف ناس يابيه سمير فرج شال بيوتهم عشان كانوا متعدين علي ارض الدولة، الناس دي يابيه كانوا مبسوطين وكانوا يقولوا سمير فرج شال بيتي وبيت المستشار فلان او اللواء فلان، يعني الراجل كان بيساوي بين الجميع، معندوش كبير وصغيير !
واشار السائق خلال توجهنا الي منتصف مدينة الاقصر ، اشار الي طريق الكباش ، وقال : اهو يابيه سمير فرج هو اللي عمل طريق الكباش ده وشال التعديات اللي كانت في طريقوا ، انما لما مشي وقف المشروع !
ثم اشار الي مجري النيل وقال : ادي يابيه المراكب العايمة واقفه اهي بقالها شهور وسنين ، دي كانت بتجيب خير لينا ولشبابنا علي طول رحلتها من الاقصر لاسوان، بتشغل كافتيريات وحناطير ومطاعم وبازارات .. انما دلوقتي زي ما انته شايف !
قلت : طب والحل ايه عشان احوال الناس تتعدل هنا في الاقصر ؟
قال : يابيه الحل ان الحكومة تشوف حل ويبقي الاقصر مش قايمة عالسياحة بس، لازم يبقي فيه مصانع ومزارع ومشروعات يا ما ، غير السياحة ، عشان السياحة لما تقف ما تقفش الدنيا كده ، الناس ما بقتش مستحملة !