__مجرد حِلم __
مجرد حِلم وف حينها
أنا اتمنيت
تكون لك روحي وسنينها
وفجأة صحيت
💌
مجرد حِلم وحلمته
ف ليلة صيف
وقلبي سألني فَهمته
إن نومنا خفيف
💌
مجرد حِلم دوبني
وطار نومي
ياخدني الفكر ويجيبني حنين ل عيون .. ما بتسيني
وحاضنه عنيا طول يومي
💌
صالحت الدنيا ولا الأيام
خلاص الحظ على بابي
بقى يخبط وفي الأحلام
كتير هيعدوا أحبابي
💌
مجرد حِلم عِشت عليه
سنيني وبيه دفيت ليلي
و رافضه عنيا بعد عنيه
تشوف غير طرف منديلي
💌
مجرد حلم كفاني
وبيه استغنيت عن الدنيا
وحضن القلب دفاني
وحسيت بالهنا ف ثانية
💌
مجرد حلم بيه صالحني
الزمان ليلة
نسيت مين شوفته وجرحني
وساب لي من الهموم كيلة
💌
سنين عدِت وراها سنين
وانا بَنده له واستنى
ويوم أضحك و قلبي حزين
ويوم أدعي وأتمنى
يعودلي الحِلم لو ساعتين وأقول للصبح يستنى
💌 💌
بقلمي الشاعرة زينب شبل ١٤/١/٢٠٢١
