ونجاح ابو كرتونة اعداد عصام فتحى سعد
متابعة عادل شلبى
لعبة الانتخابات والأحزاب ونجاح أبوكرتونه والقائمة الوطنية والسبع الاوائل فردي مستقل .
أوارق اللعبة قد تغيرت
اذا كنت قد أعلنت عن خوضك المعركة الانتخابية
…فتمهل قليلا وفكر بعقلانية وأحسبها جيدا
أوراق اللعبة قد تغيرت تماما ….وفاقت كل حساباتك
ترسيم الدوائر لن يخرج للنور بعد ولن تنتظره في دور الانعقاد الخامس والأخير
آخر شئ هيطلع من الكنترول
اذا كانت لديك جدية في الترشح فاللعبة الان في يد الأحزاب ….أمامك طريقين أحلاهما مر
الطريق الأول هو طريق القائمة المطلقة المغلقة مع القائمة الوطنية التي قد تزيد في معركة البرلمان عن ١٢ حزبا سياسيا سيحدث بينهما تحالفا كما شاهدت في انتخابات الشيوخ
وستكون قائمة مطلقة مغلقة وكمان هتسمي بالقايمة الوطنية
الطريق الآخر هو أن تكون مرشح أحد الأحزاب الفاعلة علي الساحة السياسية في مصر وهم ما يقرب من ١١ حزب تستطيع أن تراهن عليه
وطبعا الحزب مش هيقبلك مرشحه علشان سواد عينيك
لا… هو عايز شخصية لديها كتلة انتخابية كبيرة ولديه جاهزية واستعداد للحراك والنجاح
وبرضه مجموعة الأحزاب التي شكلت القايمة الوطنية
هتدفع ببعض مرشحيها علي المقاعد الفردية
صحيح مستقبل وطن بينافس علي الأغلبية وهيطرح كل مرشحيه علي المقاعد الفردية …..
لكن علي الأحزاب الاخري المنافسة تكون قد استوعبت الدرس وتدفع بمرشحين أقوياء ينافسوا علي النصر لا الهزيمة
يا كل المرشحين أصول اللعبة تغيرت اللي بيفكر أنه ينزل فردي ومستقل هو حر يتولي بيه ربنا
أصول اللعبة والانتخابات لا تعرف نبل ولا مكارم أخلاقك ولا انك راجل طيب لا هي أبجديات المكسب والخسارة في المقاعد النيابية
العفي مفيش حد بياكل لقمته دي منافسة انتخابية
مش مسابقة ملك جمال الشنب
دي شغل انتخابات مش مسابقة جمعية خيرية مين اكتر راجل طيب في البلد وعمل خير
القادر علي المنافسة وأصول اللعبة يتقدم الصف
الحزب الذي لديه نية لخوض المنافسة الانتخابية يعد كوادره ويشد حيله ويفتح له مقار حزبية في كل قرية وفي كل نجع وفي كل عزبة ويبدأ يتحرك بين الناس بقواعده الجماهيرية
مقاطعتك للانتخابات هي سبب الفشل وسبب استحواذ مستقبل وطن بكل المقاعد
لا مكان للمستقلين في ممارسة سياسية أو أي استحقاق انتخابي
فعل دورك انضم لأي حزب لا تكن خائفا أو جبانا انضم لحزب وفعل دورك وتحرك وناقش وتحاور وكن إيجابي
الانتخة والنقد ومقاطعتك للانتخابات هذا هو أقصي ما يتمنونه ٧ فردي لمستقبل وطن معاهم ٧ في القايمة الانتخابية لعبوها صح أقل واحد فيهم جاب ٦٠٠ ألف صوت انتخابي لأن كل واحد في القايمة كان بيشتغل للفردي من ١الي ٧
وكل واحد من السبعة بتوع فردي مستقبل وطن كان بيشتغل
من ١ الي ٧
لعبتها صح …واحنا زعلنا وانتقدنا وقلنا كل اللي نفسنا فيه
وهما ولا في دماغهم وفهموا أصول اللعبة ولعبوها ونجحوا
كان في أخطاء …نعم بالجملة
كان فيه مال سياسي نعم
كان فيه زيت وكراتين ممكن
لكن هل لعبوا الماتش بشكل احترافي
اقولك انا لعبوا وكسبوا
ودي بروفة للنواب
يا كل مهرج طرح نفسه للانتخابات البرلمانية علشان مراته قالت له أنت شيك وجميل وعليك القيمة وأحسن من نواب كتير ومصر أمانة بين ايديك
ياكل محترفي السقوط كل استحقاق انتخابي برضه ملكشي مجال في النجاح
يا كل عبده مشتاق أصول اللعبة تغيرت وكل حزب لديه بنك مرشحين هيدفع بيهم
بالله عليكم ادرسوها صح
فكروا بعقلانية …
احسبها بينك وبين نفسك ولو انت عايز تسلي أسلي في لعبة تانية
دي انتخابات والأحزاب دورها غير دور شيخ الأزهر
في عرف كل الديمقراطيات هي تنافس من أجل المكسب والاستحواذ والأغلبية
وفي النهاية اطمن اللعب الجيد يكون من خلال الاحزاب
صحيح لسة المشوار علينا بدري لكن انتهي الدرس
وشئنا أو أبينا أو بكينا أو حزنا أو لطمنا الخدود أو شققنا الجيوب هو ده الواقع الجديد ودي أصول اللعب في انتخابات النواب القادم
