( ضي النهار )
كل القوافي والحروف
كل الكلام
سكتوا ووقفوا للسلام
وقهوة عصاري والكفوف تدى التحيه
للبهيه ام العيون متكحله
بشوق السنين
والحنين بيشدها تفرد ضفايرها الكتار
على الجدار وتنحنى تلم الأنين
وجع السنين زاد حدوده
ملا الجناين والغيطان
والشيطان
داير يوسوس ف النفوس
وانا لسه قعدتى ف دارى الحزين
من سنين
ولا حد خبط ع البيبان
ونخلنا عجز وشاخ
ولا عمره ف يوم طرح
ولا شفنا منه حتى الفرح
سنين وانا عشمان ف جنتي
غابت حبيبتى وضيها
لسه بيلمع ف العنين
كل ما طيفها يجي فخيالى
وبعلو صوتي عليها الالي
وعارف انها
يمكن تكون مني قريبه
ريحة عطرها ماليه المكان
حتى لو عدا النهار ب١٠٠ نهار
لساها برضه جوه الجدار
وانا لسه بشرب قهوتى وقت العصاري
وبستنى اشوفها تنفض عنها غبار السنين
تبعد الليل الحزين عن خصرها
وتلم تانى شعرها وتضفره بضى النهار
