للي شايف نفسه ع الناس وهو ميسواش
( حبشتكانات )
لو ناوى مره تستحمر وتحمر ف عنيك وتبخر
وتسخر كل اللي حواليك
وتحضر جني وترجم ف حروف
تبقى انت خروف
ولا تعرف حاجه ولا تفهم هما اللي باعوك
لو فاهم انك كده كبيرهم ومتاوي السر كده ف بيرهم
يبقى خدعوك
عملولك زفه وغنولك والفرح قالولك هيطولك
فرشولك أرضك بالازهار دقولك طبله والمزمار
وف دور مش دورك وهموك
بص يا حلو وصحصحلي
لو عايز تبقى كبير ليهم
وتعيش وسطيهم لياليهم
وتعيش الدور
تحكم بالعدل ف قواضيهم وتكون خدام اصلا ليهم
وبلاش تظلم ف الغلبان وتبين حقدك حواليهم
يا تعيشها صح تكون انسان
أخلاقك للكل تبان
يا تحضر جني وترجم ف حروف توهان
وتعيش بهتان
ومسير اصلك للناس هيبان
نبيل ابو رامى الاسوانى
٢٠٢٥/١٠/٢٩
