لما تخونك صحتك

لما تخونك صحتك
متاع الدنيا مش هيساع
فيه خلق تهمل السؤال عليك
تنكر الجميل وتنهش فيك زي الضباع
وخلق تزعل لو يمسك اي سوء
وناس غرورها في الدنيا المتاع
الغلاوه تبان وقت الشده والضيق
واللي فرح في كربك بكره يدوق
الشده لما شدت بينت كل واحد ع أصله
وعرفتنا مين حلال عشرته ووصله
اوعي تتغر في المظاهر
دي في البدايات يا صاحبي كدابه
اصبر وقت المواقف تبان من أفعالها
عشان الخلق في ضمايرهم قلابه
متقولش دا مستحيل يتخلي
والله هيحصل اللي خارج توقعاتك
ف نفسك عودها وهيئها
في ناس داخله حياتنا تتسلي
وناس شايفه فينا الضهر والسند
لو كترو حواليك ولقيتهم مجرد عدد
اوعي تحزن وتلوم روحك
جلد الذات متعب بزياده
فلوحدك لملم جروحك
مش في كتر الصحبه تلاقي السعاده
عشان فيه صاحب يغنيك عن العالم واللي فيه
تفرح لما يشيل عنك
وكلام الدنيا في قربه ما يكفيه
زعلان ..طب ليه.. ومن الناس ايه مستني؟
طب فاكر لما كانت تقول الست وتغني
حب ايه اللي انتا جاي تقول عليه
قوم وانهض وعيش الحياه لرضا ربك
والله دا الوحيد اللي ينولك الجنه لو حبك

كتبت/أم هاشم العيسوي