بقلم انور عبدالحميد
شهدت دول العالم ارتفاع ملحوظ فى سعر الدولار الأمريكى وليس بمصر فقط بل اهتم به المصريون اكثر من الوجبة اليومية اصبح الزوج ينادى زوجته بالعملات الأجنبية يعنى انتى مافيش ين اجمل منك وينادى اولاده بالعملات الخليجية يقوله ياد يادرهم انت ولا المعاكسات فى الشارع بقت للبنات روحى كدة وانتى شبه الدولار الأمريكى واصبحت العملات جنون الشعب المصرى حديث الصباح والمساء وكلام القهاوى اللى معاه واللى معهوش كله باع واشترى بالكلام حتى اصبح الدولار سراب لا حد بيشترى ولا حد بيبع
طيب ياعمنا انت بتسأل على الدولار ليه يقولك بحب اهتم بالأقتصاد والأسعار اليومية هوما عندوش غير 2400 مرتبه اللى بيوزعهم اول الشهر لما يوصل البيت وانتى ياحاجه بتسألى على الدولار ليه والله يابنى انا بسال عليه لما قالولى هو سبب فى ارتفاع سعر باكو الشاى بقا ب7 جنيه وانت ياصاحبى بتتكلم على الدولار والله انا لقيت كل الناس بتتكلم عليه قولت لازم ااقطع فروته انا كمان ماهو مش مصرى
ولا كمان اصحاب البوستات الترفيهيه على مواقع التواصل الأجتماعى واحد بيقول خلى الدولار يطلع زى ماهو عاوز لحد مايوصل 70 ويموت لواحده والتانى بيقولك مانجوزه الجنيه المصرى يمكن يقضى عليه بعد شهر العسل
اصبح الدولار حديث الشارع المصرى وسبب ارتفاعه فى السوق السوداء هى شائعات المصريين يعنى لو سألت حد يقولك 30ج سعره طيب ياعم نفذ مافيش تنفيذ لأنه معندوش اصلا دولار فارحمونا يرحمكم الله
