كتب محمود فهمى .
..بمناسبة عيد الأم كتبت الإعلامية د. الشيماء عماد الدين منسق عام شبكة إعلام المرأة العربية ومقدمة برنامج أوقات على قناة الصحة والجمال تدوينه على حسابها الشخصي على الفيس بوك فى رثاء والدتها وجاء فى التدوينة ،،: يااااه
يا وجع قلبى عليكى يا امى.
روحتى فين وسبتينى لوحدى ؟
روحتى فجأه،من غير مقدمات
من غير حتى ما ألحق اسلم عليكى..
تعبتى كتير يا امى … انا عارفه وصبرتى كتير…
واتألمتى واتعذبتى كتير…
كنت حساكى وحسه بوجعك اوى
و رغم وجعك كنتى مصبرانى ع الدنيا ومونسانى،
ورغم ضعفك….
كنتى سندى وعزوتى..
كنتى احلى حاجه
فى حياتى.،
واعز شخص عندى فى الوجود.
.
عارفه… طول عمرى، عندى احساس غريب بالمسؤليه عنك…
.
كبر معايا يوم بعد يوم،
لحد ما بقيتى شاغله كل وقتى وتفكيرى …
ورغم ان المسئوليه كانت صعبه ورغم انى كنت حاسه بيكى،،،
وعارفه انك نفسك تقبلى ابويا واخويا..
كنت بشوفك وانتى بتحاولى تدارى دموعك عنى، وعن كل الناس، حتى اقرب الناس ليكى،،،
كنت اتمنى يطول عمرك 100 سنه كمان يا حبيبتى
او يا غاليتى ذى ما كنتى دايما بتندينى
يارب تكونى فى حته احسن،،
يارب تكونى قابلتى حبايبك،
يارب تكونى نولتى جزاء سعيك صبرك وايمانك طول السنيين
يارب نرجع تانى نتجمع مع بعض
انا
وانتى
وابويا
واخويا
زى زمان …
بس يارب المره دى نتجمع فى الجنه ..
الى لقاء قريب ياامى
،،و اتمنى ان اليوم الى هشوفك تانى فيه
،، تكونى ذى ماكان نفسك طول عمرك تكونى،
“فى مقعد صدق عند مليك مقتدر”
بنتك
شيماء عماد الدين
