كتبت نهي عبد الخالق
ناس كتير قريبين مني استغربوا إن أول عمل تشريعي قدمته في الدورة البرلمانية الجديدة كان بخصوص تغليظ عقوبة التنمر على الأشخاص ذوي الإعاقة في القانون 10 لسنة 2018 ..
الحقيقة من وقت ما كنا بنشتغل في حملتي الانتخابية، قابلت كتير من أبطالنا ذوي الإرادة، وسمعت مشاكلهم، ولقيت إن أهم مشكلة بتواجههم هي التنمر !
وأنا الحقيقة مش بفهم إزاي حد ممكن يفكر يسيء لأبطال زي دول، وبقول دايمًا إن اللي بيسيء ليهم هو اللي عنده إعاقة مش العكس !
علشان كده أطلقت حملة #مش_هنسيبكم لوقف التنمر على الأشخاص ذوي الإعاقة، اللي شملت تحركات علي الأرض ولسه مكملين فيها ..
أنا تشرفت بمقابلة أبطال ڤيديويهات التوعية في الحملة، ياسين، ومهند، وهبة، وهشام، وإسلام، وكابتن شعبان، وكابتن شيماء، وسيادة النائبة جهاد، ورامز، وأسرهم وأصدقائهم.
حقيقي محستش بالوقت وأنا معاهم، أنا كنت قاعد قدام قصص ملهمة، من لحم ودم وإرادة، اتكلمنا كتير، واتناقشنا في تفاصيل تخصهم.
الابتسامة مفارقتش وشي وأنا معاهم، ومكنتش عايز الوقت يعدي، خرجت من اللقاء وأنا عندي طاقة أمل وإيجابية ورغبة كبيرة في الإنجاز.
وفي لفتة طيبة منهم كرموني بدرع، بعتبره أغلى وأهم تكريم في حياتي، أنا بوعدهم إني مش هخذلهم وهوصل صوتهم بكل الطرق، عشان دي أبسط حقوقهم علينا
