قالو زمان
الفرخ الجعان يحلم بغيط القمح
والأعمى يتمنى لو رزقه كله عيون
وعيشك حتى لو كان فيه ملح
فى لحظه تلقاه على ولاد الحرام بيهون
وجارك السابع له حق فى حزن وفرح
لا عليه تجور ولا فى عرضه تخون
يا اللى نويت ع النسب قبل النسب حاسب
يا عم حاسب ودور على المضمون
وإقلب القدره علي فمها ولاحظ
ان البنت لطبع امها بتكون
حاسب وإياك تآخد القرد على ماله
حيفضل القرد ويروح ماله لو مليون
وتوبك الدايب اياك ترقع فيه
ولا يوم تعاتب عويل ملعون
إعزم وإكرم وأكل العيش دا نصيب
وإكرم ضيوفك لو حتى تبات مديون
ولو جالك الضيف والرزق يابنى قليل
إضحك فى وشه ووسع فى الماعون
اوعاك تدخل بين البصله وقشرتها
لا تتبع العورات ولا تسيء فى ظنون
وخلى بالك طباخ السم بيدوقه
وبكره تدور الدواير على كل شكل ولون
قالو سكينه الأهل بتكون دائما بارده
وكتير بات بنصلها مطعون
وإياك تطعم الفم علشان تكسر عين
داللى أكل عيشك لابد لعيشه تصون
وبصله حبيبك من اللحم وزن خروف
تآكلها وترضى وكمان تقول ممنون
وقلل صحابك صدقنى رح ترتاح
ووقت الشده العدد بس فى اللمون
وإياك تآمن لولاد الحرام مره
داللى يآمن الميه فى الغربال مجنون
وفى الآخر ابعد عن الخلق اريحلك
خليك فى شأنك وللخلق يابنى شؤون
ولا كل اللى رص الصوانى حلوانى
ولا كل اللى قال الشعر شعره جميل موزون
وسلامتكم
مساء الورد. الكومى
