عامل ايه بقى؟
فى كل مرة طلبت منى فيها اتكلم ومكنتش بتكلم كانت دماغى بتتكلم بدل لسانى
لان وجودك اكبر اكيد من استيعابى و ابعد بكتير من ان ايدى تطوله
اه أنا بعترف انت ورطة كبيرة ورطت نفسي فيها بس صدقنى من غير قصد
والغريب انى معرفش كلامى هيوصلك ازاي
بس يمكن اكون بأمرن نفسي على اللى مفروض اقوله فى يوم
متفتكرش انى محاولتش ابعد بعدد حروف الكلام الكتير اللى مقولتوش ونفسي اقوله
بس كل لما ابعد الاقينى بغوط اكتر
تبعتلى رسالة تشقلب فكرى عن الهرب و ارجع زى المسحوبه بحبل شفاف بيضوى فى عينيا
اسمع صوتك احس انه بيخترق حدود ادراكى
ايوة انا بفكر فيك اكتر من بكتييير ما بفكر هاكل ايه ..هالبس ايه.. هقول ايه
وبأقول حاجات مش مسؤولة عنها و كأن روح تانية هى اللى بتنطقنى
زى انى اسالك ما تيجى ننزل شوية
وبعدها احط ايدى على وشي و ازعقلى انت ازاى تطلبي كده؟
و قبل ما اخلص الجملة بتكون ناطط فى العربية و جاي فى السكة
افرح و اضحكلى و اقول برافو عليكى
كل الحوار دا بيحصل جوا الجملة اللى لسه مخلتش
لسه فاكر انى مبكلمش؟
طب عارف لما بسألك فى مواضيع و اسيبك تكلم و تطول فى الكلام
طب تفتكر امريكا ناويه على ايه؟
هو البنزين هيغلى؟ و لا بتحب ايه ؟ احكيلى الخناقة من اولها؟
انا بوديك المشاوير دى عشان اسرح فى كلامك و اخد فرصتى ابصلك
و ميبقاش مطلوب منى كلام
بتلخبط لما تبص لى و انا بتكلم
و بخاف تلاحظ و انت بتلاحظ و بتدارى
ولا لما بتخلص كلامك و تدور على كلامى و ملاقيش اي حاجة تتقال
اقولك و انت عامل ايه بقى؟
بكون عايزة اقول اللى انت مستنيه
انا ماليش ذنب انت اللى احساسك بيا بيلجمنى و يقيد لسانى
عينيك بتقول انك مستوعب خوفى و صابر عليا
عارف لو تبقى اقل ذكاء شوية لو احساسك بطفولتى يختفى حبه
كنت اتشجعت و عرفت المح حتى
كل حاجة قلت لك بحبها فى الرجالة عكسك متصدقنيش فيها
ايوة انا كذابة عشان انا بحب كل حاجة فيك انت
بس زى ما انت بتلخبطنى انا كمان لازم الخبطك
طب عارف انى ساعات بدمع لما بكون عايزة انطق و اقر و مبعرفش
لما بيلفت نظرك منظر بعيد او تدور وشك و انت بتكلمنى
بتبقى فرصتى اقول و انت مش واخد بالك
واحفظ ملامحك اللى انت معندكش فرصة تشوفها
ما هو محدش بيشوف ودنه يا اخى
و لا بيعرف شكل ضهرك
بحب اعد الشعر الابيض اللى فى راسك
دى حاجات مش هايفة على فكرة دى حتت منك ممكن تكون شاهدة على كلامى اللى مقولتوش
يا اخى فرصتى انى اتنح فيك من غير ما تلخبطنى ولو انى شاكة ان ذكاءك شايفنى من ضهرك
ولا مرة سالتنى و عرفت اجاوبك و انت اكيد عارف الاجابة و انا مكملة كذب عادى
مصمم تلعب دور المطنش بس انا مبلعبش البريئة
عشان انا مش بريئة بس مش جريئة
تفتكر لما انت بتجاوب على اسئلة انا مسالتهاش دا بيطمنى؟
دا بيحسسنى اد ايه انا وقعت فى بير مالوش قرار انا مش اده
بتجاوب على اسئلة انا مسالتهاش انت ليه مش زى باقى البنى ادمين وليه انت بالخصوص لا تقاوم؟
اشمعنى انت؟ سوال اجابته بتنزل زى ترجمة الافلام
ليه و انا معاك خفيفة زى الريشة طايرة من غير حساب
يمكن لو تسيبنى حمام زاجل كنت على الاقل اعرف رايحة فين
و مفيش طير بيطير على نغمات موسيقى حلوة زى اللى بسمعها فى الباك جراوند
حاجة من مزيكا عبد الوهاب او محمد فوزى و
و هى بتقول ما يكونش دا اللى اسمه الهوا
و يا خوفى لميكونش له دوا
مع كل جملة بتختصر مسافات
وشي بينور و عقلي مش بيسيطر انا مش بافور
ليه مكنتش عادى و متكرر
بيضايقك نفس الحاجات اللى بتضايق كل الناس
. انما انت حابب كل حاجة و بتشوفها بزاويتك اللى بقيت ببص منها و حابة اللى كنت بكرهه عشان انت شاورتلى عليه
ليه متبقاش بتفتح نفس المواضيع بتاعة كل الناس
التريندات و افيهات الافلام و هيافة المشاهير
ليه دماغك بتقول اللى مش بتوقعه و لا اللى الناس بتقوله
طب ليه مش بزهق من كلامك و دايما اطلب تكلمنى انت تتكلم مش انا
ليه متبقاش عادي زى كلهم متشدش ليه كلامك بيدخل جوايا يروش و بيدوش؟
شاطرة فالزوغان ومعاك اتشنكل فالتوهان
بطل تضحك على توهانى ،باخد بالى انك بتدارى ضحكك عليا
و بتوه واتلخبط اكتر
ولما احس ان التنويم المغناطيسي هيبتدى واقولك
و تقولى لسه بدرى ما بصدق تقولها عشان اقول لنفسي
هو اللى قالى خليكى مش انا اللى شبطانة
بكون عايزة اقولك متسبنيش اروح وصلنى لحد باب البيت
كل مرة قلت لك فيها يا جميل او قشطة يا اي حاجة
طب عارف كل مرة زعقت فيها من غير داعى دى مكانتش هرموناتى بتلعب
و لا فاصل من الدبش المتواصل المعروف عنى
دا كان جنابك عاملى حالة تربنة فى النافوخ و بعلى صوتى عشان متاخدش بالك
و تتعصب تتلهى فى اسلوبي
و كل مرة بتسلم عليا بالايد هى هى نفس القشعرة
اوقات بقفل معاك فجاة و اهرب من زنقة زنقتهالى زى شكلك كان حلو النهاردة و لون معرفش ايه اللى كنتى لابساه و اقولك عايزة انام
النوم برئ منى السهر يمسكنى و يفضل يسألني لحد امتى هتفضلى هربانه
و لا مرة جاوبته و لا هجاوب اسئلة عينيك اللى متجاوبة من غير كلامى
انا بقولك و مش خايفة عشان انت مش ادامى
انا بحبك حتى لومش هقدر اقولك
اناهفضل موجودة حتى لو مكنتش لك منسوبة
انا اضعف من انى اتمسك و اقل من انى اسيبك
انا مش هتشجع و انت مينفعش تتهور
انا بكلم بس مش هكلم
انا كل مرة هتربكنى هقولك وانت عامل ايه بقى؟
شرين هلال
