ولدى
ربيتك علشان تكون ضهرى
اياك ضهرى بعقوقك تكسره
ما هو ضهرى لو بايدك يتكسر
مفيش ايد من بعد ايدك تجبره
خليتك للشيبه عكازى والسند
اوعى تكون سوسه عكازى تنخره
يا كنز عمرى اللى جمعته
يارب كنز العمر ما اخسره
بنيتلك في القلب عشك
اياك عش القلب تهجره
لو خيرونى ما بين عقوقك والنظر
خيار ما اتمنى يوم اتخيره
لكن لو بايدك حكم الزمن
اختار العمى ولا جفاك اتصوره
يا نبته العمر فى سنينى
يا زرعه رويتها بحنينى
ومن انينك كان انينى
يا جسر للشيبه بكبره
ولما بكره
تكون فى مكانى سهران
ابقى افتكر
مين كان وجعك بيسهره
ولما يمشى بيك الحال
وتكون من زينه الرجال
ابقي افتكر كتفى اللى شال
وانحنى ليه واشكره
يا ولدى
وعلشان انت ابن حلال
مش خايف عليك
لا من الدنيا ولا الايام
ولا حتى ولاد الحرام
وطزيقك لو فيه ظلام
برضايا ربك حينوره
ويا ولدى وصى ولدك
لو في يوم تنحنى
لازم لضهرك يرفعه
ويا ولدى لو حان الرحيل
ساعتها لو اتعرى الجسد
امانه بايدك تستره
يا ولدى
العقوق ده ذنب عظيم
وعمر ربك ما بيغفره
وابقى افتكرنى بدعوه منك
زى ما انا فاكر جدك في مقبره
امانه يا ولدى
بقلم محمود الكومى
