العرافه
قالت أبين زين وأشوف
طالع الشابه والجدع
أداوى القلوب التعبانين
امسح الجفن اللى دمع
كل كتف وله حمول
وكل قلب وله وجع
قالتلى وشوش الدكر
اصل الدكر قلبه اتوجع
على ناس فى الغربه تاهت
لا حد شاف ولا سمع
قلت يا عرافه البخت قولى
أيش قال الرمل والودع
قالت على الرمل خطى
وافرش منديلك فى الوسع
مسكت منديلى بطرفه
طرف منديلى اتقطع
قالت من أولها باين
البخت والرمل دمع
بصتلى بعيونها بنظرتين
ونظرها من الأرض اترفع
بنظره قالت يا لطيف
وقلبي فى التانيه اتخلع
قعدت ألملم فى الحصى
وألم ودعها إللى وقع
قالت عليك غبار السفر
فى سكه إللى راحها ما رجع
تايه فى الغربه وليفك
وضاق فضاك بعد الوسع
عليه عيونك بتبكى
وقلبك بيان من الوجع
قلتلها أمته أشوفه
ويداوى جرحى إللى اتسع
قالتلى ليلك طويل
شوفت إللى راح عمره رجع
كل إللى راح قبله نسى
وللندأ ولا يوم سمع
طريقه ضلمه وطويل
اسمع كلامى يا جدع
قلتلها عرافه ورملك كدب
طول عمره يضر وما نفع
يقينى بالله دليلى
بسط الأرض والسما رفع
مسير إللى غايب حيرجع
كدبتى برملك والودع
بقلم
محمود الكومى
