انا ماشى
مدى ايدك بالسلام
ارسمى كفك بكفى
كل حروف الكلام
عنك انت ما تكفى
ارجع اتوه وسط الزحام
اقضى باقى العمر منفى
وصفتك بكل الغرام
ولا يوم طلبت وصفى
زاهده حتى فى الكلام
مهما كان بوحى وحرفى
اسهر انا والناس نيام
عساكى بالود تصفى
انا وعدتك بالقليل
بالكتير خايف ما اوفى
وانا ماشى
صعب الاقي فى الوشوش
صوره حلوه رسمتهالك
عمر غالى معشتهوش
ولا حتى لحظه من خيالك
لحن فات مسمعتيهوش
تاه فى دنيا محالك
وانا ماشى
خلينى اشوفك من بعيد
نجمه طايره فى السما
ارسمك على كل عيد
لحن غنوه متنغمه
غزال البر العنيد
احكى جماله ملحمه
دمه يسرى فى الوريد
نور الليالى المظلمه
فى وصف جماله ازيد
بكلامى وكل الاوسمه
وانا ماشى
جيتلك وانا طير جريح
بلل ريشه المطر
تاخده عواصف وتجيبه ريح
و بابك امانه من الخطر
انا لحن قلوب مجاريح
لحن اخرس ع الوتر
بس لازم تعرفى
اللى اتكسر لغيره عمره ما كسر
وانا اللى عابر سبيل
دروبى دروب الخطر
اعشق الليل الطويل
ويعشقنى طول السهر
لكن يقينى دليل
لا حذر يمنع قدر
وانا ماشى
انا ماشى بس سايب
حاجه منى تفكرك
ذكرى من القلب اللى دايب
اكيد فى يوم حتسهرك
والفراق قدر الحبايب
كلمه بيها بخطرك
وانا ماشى
بقلم محمود الكومى
