مسحراتي
————–
مسحراتي وليلاتي ف البلد رحال
الف وانادي وكلمتي …. مواااال
صاحبتي طبلتي وغنوتي أمثال
تحت الشبابيك انادي ع الأحباب
شغلتي وماشي في البلاد رحال
(المشي طبعي والدق على طبلي)
تلاتين يوم ألف و أدور ع الأحباب
أصحي النايم وعن السحور غفلان
اصحى يا نايم وحد الديان
عارف وحافظ أهلي وناسي
وبأساميهم حافظهم ومش ناسي
ليل رمضان أنوار أشكال وألوان
يأم سمير قومي سحري العيال
طبق فول ومعاه زيتون وجبنة
وأبو العيال أديله كباية زبادي
ورغيف طري بسرعة واتشطري
وأنت يا فكري قوم لسحورك اجري
دالسحور بركة بلاش تكون كسلان
وأنت يا سعاد رمضان فايت يعدي
سريعة أيام الخير كما الرهوان
ادعي معايا وقول يارب تنعاد
علينا بالخير وعلى كل العباد
يا شهر الخير هليت علينا
وهلالك بالبركة والخير عمران
بالفرحة نستقبلك وبالحب تجمعنا
تلم شمل قريب …… وبيعـــد
هليت علينا بالإيمان والخير
نحس ببعضنا ونساعد الغير
خلاص بتفاق والروايح الحلوة
في كل بيت كحك وغريبة
تهادي البعيدة واللي قريبة
الكل بيساعد والسهره صباحي
تجينا يا رمضان تبدل الأحزان
معاك الدنيا بتبقى أمان
حتي في وداعك بتحتموا بالعيد
والفرحة تكبر والخير بالبركة يزيد
مسحراتي أنا بتمنى رمضان
طــــول السنـــه
وبقول وداعا يا شهر القرآن
بالرحمة بدايتك والمغفره
عنوان
وفي الأخر حلاوة الجايزة
عتق من النار لكل اللي فهم الدنيا
وقرب من ربنا وغسل ذنوبة
وقال يارب حسن الختام
والنية هي التوبة
#بقلم_حنان_محمدعبدالعزيز
