أيام زمان
~~~~~~
آه يا زمن العبر
توهتنا في سكتك المهجوره
لا فيها بصيص نور ولا خطوه معدوله
نمشي خطوه صح والتانية معتوره
زمن متشقلبه فيه موازينه
نمشى يمين تجيبنا شمال
هو احنا عمينا ولا عينك بقت حوله
فين أيام زمان
أما كانت الدنيا معدوله
لا كانا فريقين دُولت ضد دُولا
كنا فريق واحد الايد في الايد متوحده القوله
زمن كان جميل فات وعدانه
وساب لنا ذكرياته الجميله
نفتكرها ونقول
اما اذا الايام زي الرّجل الشوله
بدل ماتمشي بينا لقدام
ترجع بينا سنه اوله
أيام الخير والبركه
ولمة العيله
والقى نفسي في حضن امي
وبضفيره مجدوله
ايدي في ايد اخويا
وبكل حب وشوق وحنان
نجري ع المدرسه
ونفرح اما يضرب جرس 🔔
المرواح كأنه بيدق طبول الافراح
ولمة رمضان وقت الاذان
كل الاهل والاخوات ملمومه
ع الطبليه
تسمع الاذان ومدفع الفطار مستنيه
وكأنها فرحه تدخل القلب
متهنيه
وبعد الفطار نحلى بالياميش
ونجري نلعب مع ولاد الجيران بكل امان نسهر
لما المسحراتي يلف
نستناه نمشي وراه
نسمع مواويله وحكاويه
ومعانا الفوانيس بالشمع متقاده
وكان الخير فايض وبزياده
وفرحتنا بلبس العيد
وليلة العيد دي حكايه
فستاني جنبي ع السرير والجزمه متورنشه
ومصروفي تحت المخده
ونتمنى الصبح يجي بسرعه
علشان نجري نروح العيد نصلي ونلعب مع اصحابنا
زمن جميل واصيل
والبلح مدلي شواشي النخيل
والزرع طارح ورويه النيل
زمن ماكان يفرق بين مله
ودين
الكل واحد والحب في القلوب نابع
مافيش مكان للحقد الزعل
البيت بيت العيلة والجيران
ياريت تعود ايام زمان
ونسمع صوت الجرس مع الاذان
وكل يعبد ربه زي ماكان
بكل روحانيه وامان
#بقلم_حنان_محمدعبدالعزيز
