.عايزنا نرجع زى زمان
مين مايحبش الاصاله الذوق والروقان
أغانى جميله وحلوه طرب والحان
يتلم ولاد الحته حبايبنا والجيران
كلام جميل وهادى كله رقه وحنان
كله حب وموده بالصحبه والخلان
أحمد جرجس ومينا يوسف وشعبان
القاعدة عالحصيره لو المزاج خرمان
نولع الجوزه ونحبس بكام فنجان
والحكاوى تدور وتكتربمجيه الجدعان
والضحكه صوتها يعلى تصحى الجيران
والسهره تطول وتحلى نسمع فجر الاذان
ندعى سوا بقلوبنا لرب واحد ديان
ينعم بفضله علينا بالحب والايمان
……. ……. …… ….
ايه جرى ف الدنيا اتقسمت الوان
زمن المحبه اختفى وياعينى عالانسان
راح ضحية بشر ما كانوا فالحسبان
خلوا العقل ابتلى وراح ف التوهان
ملوا دماغنا بفتاوى غيبوا الجدعان
والنتيجه بلاوى وخراب فكل مكان
الاخ يقتل اخوه ويكبر ب الرحمن
مصيبه وحلت علينا وذاد الجنان
راح زمن المحبه الطيبه والحنان
راح من افعالنا الامن والامان
على رأى سومه ورامى الفنان
عايزنا نرجع زى زمان
قول للزمان ارجع يازمان
……………………………
