في بلدنا أي زوجه تقول لأخو زوجها يا عم حتى لو أصغر منها ب 20 سنه
, و أخت الزوج اسمها عمّه , ده لا قهر ولا استعباد , دي موده و محبه .
في بلدنا أي راجل بشنب ملو هدومه يقول لأي ست أكبر منه يا خاله حتى لو ماتقربش له ,
خاله فلانه , لو كان عندها ألف فدان
يقول لها يا خاله , ولو بتبيع جرجير قدام الجامع يقول لها يا خاله .
في بلدنا العم بيتقال له أبوك فلان , روح هات كذا من دار أبوك فلان , اللي هو عمك , و الجد بيتقال له سيد , سيدي فلان
و أي راجل عجوز بيتقال له يا سيد ياجد
في بلدنا الإبن حتى لو كان أستاذ في الجامعه يبوس إيد أبوه و أمه
و عمه الكبير و خالته الكبيره , يوطي و يبوس ضهر إيدهم مش يبوس خدهم .
في بلدنا لو حد تعب البلد تتقلب , ولو حد مات كله يعزي و يجهز أكل للضيوف
اللي جايين يعزو من بره البلد ( كل بيت يجهز أكل )
, و في الفرح كله يحضر من غير كارت دعوه , من غير قاعه , البلد بتبقى هي القاعه .
في بلدنا ناس بتصحى من الفجر تركّب العده عالحمار و تعلّقه في العربيه الكار
و تربط البهايم في العربيه من ورا و صوت ماكينات
الري يظهر مع أدان الديوك , و أرض عطشانه بتشرب و عصافير بتسبح ربنا .
في بلدنا لو ماشي وشايل حاجه بتتاكل جايبها من الارض لازم تعزم عالناس اللي بتقابلك
, خد لك شوية بصل أخضر صابحين أهم
, خدي لك كرنبه يا خاله .
في بلدنا ناس بتنام بعد العشا , إيديهم خشنه و مشققه , بينامو مهدودين و مبتسمين
, لا سمعو عن أمراض نفسيه ولا يعرفو السيبراليكس و لا المهدئات ولا لعنو الظروف ولا الدكتور قال لهم محتاجين
تطلعو شرم أسبوع عشان تغيرو جو .
في بلدنا ضحكه بتطلع من القلب و كلام حلو , صباحك نادي , خلّي عنك
, عواف عليهم , من يد ما نعدمها أبدا .
في بلدنا لا كان فيه نقاب ولا جلابيه بيضا قصيره و لا ست تتدارى كأنها عار .
في بلدنا طرنبة مايه عمرها أكبر من عمر كشك عالخليج و شجرة عمرها أكبر من عمر أمريكا .
في بلدنا وشوش بتعرف تبتسم و عواجيز في ملامحهم خريطة بلد , و عيال صغيره بتاخد الحكمه والفلسفه من القاعده مع الاجداد
( لما بيقعد مع جده سيده ) , مش من كتب ( الخواجات ) .
في بلدنا أدب و خجل و توقير للكبير و فيها حياه , حاجات كتير اختلفت بس لسه فيها حياه , الله يلعن المدنيه عالتطور
على أمريكا عالوهابيه عالماميز عالديموقراطيه على كتب عذاب القبر على عوجة اللسان على بليز على ميرسي عالماكياج
و الماسكات و الوشوش المستورده البلاستيك . تحيا مصر ويحيا الوطن
