انت سعرك كام ؟
بقلم /انتصار شاهين
كل أمنية بتيجي في بالك هي في حد ذاتها أمنية محققة .. لإن عقلك ميقدرش انه يستحمل فكرة ضد امكانياتك الحالية .
يعني فيه ناس مستحيل تصحى من النوم مثلا تقول انا عايز اشتري BMW X6 .. لان عقلك مش هيفكر فيها .. بس ممكن يصحيك من النوم علشان تاكل مثلا
. أو تشوف الفيسبوك أو تبص كده على “نسمة” بعتتلك رد على طلب التعارف ولا لسة .
الأمنية في حد ذاتها نبوءة .. انت عارف انك تقدر بس انت واعيا مش فاهم انت ازاي هتقدر .
سعرك = الأمنية الموجودة في عقلك واللي بتقوم من النوم بسببها + الخطوات اللي بتاخدها في حياتك مضروب في عدد الكورسات التدريبية
أو الكتب اللي بتقراها مطروح من المجموعة أصحابك اللي بيوقفوك مكانك وكل ده هنضربه في ايمانك انك تقدر .
لإن كل انسان ليه سعر .. الجملة ديه كانت كافية انها تغير حياتي بالكامل .. يمكن لاني قريتها وادركتها بشكل ايجابي .
. عرفت قانون حلو اوي مذكور في آية قرآنية مبسطلك الدنيا كلها في 6 كلمات .. “وأن ليس للإنسان إلا ما سعى”
عايز الناس تدفع في المنتج اللي بتقدمه 1000 ؟ اصرف عليه 100000
عايز الدنيا تجيبلك BMW ؟ البس بدلة .. محدش هيركب العربية بهدوم مقطوعة.
تخيل ان الدنيا ديه كلها هي عبارة عن مجموعة من الناس اللي بتتفاعل معاك على حسب قيمتك .. هتكتشف ان الدنيا بتعاملك
حلو اوي لما تكون شيك .. شيك في كلامك ، في افكارك ،
في تعليقاتك ، في خطتك وفي اختياراتك .. وهتقلب عليك وتعاملك كانك ولا حاجة طالما انت بتغذي عقلك بالولا حاجة ..
مش مصدقني ؟ جرب بس تلبس شيك جدا ، حتى لو هتأجر هدومك .. البس ساعة محصلتش .. نضارة براند .. وراقب ثقتك بنفسك
.. ولا راقب حتى سلوكك او راقب الفرص اللي هتحصل عليها ..
يا سيدي روح لبياع السوبرماركت اللي كان بيغلس عليك وشوفه هو شخصيا وهو بيتعامل معاك بطريقة مختلفة .
بتسوق عربية ؟
عمرك لاحظت انك بتيجي جمب النقل وبتاخد جمب ؟ بلاش عربيات النقل ، كنت راكب تاكسي قبل كده ولاقيته بيزنق على
كل العربيات وبيزمر وييجي عند Jeep Grand Cherokee وبيتجنبها من سكات ؟
سعرك بيحدد الناس هتتعامل معاك ازاي .. سعرك مش لازم يكون فلوس .. ممكن يكون علمك .. تطبيقك على ارض الواقع ..
نوع الناس اللي تعرفهم ، معارفك يعني . سعرك بيحدد الدنيا هتتعامل معاك ازاي وهتديلك ايه ..
وعقلك هيقدملك ايه كأفكار تصحى علشانها بالليل وانت نايم.
فسيبك بقى من كل الل بتحكي عنه وعن صولاتك وجولاتك واللي كنت تقدر تعمله زمان بس الدنيا وقفت قصادك والناس ظلمتك .
. تأثيرك هو سعرك الاساسي .. وريني انت بتعمل ايه مش انت عملت ايه .. وانا اقدر اتنبأ انت هتكون فين.
انت قدامك اختيارين .. تقوم تشوف رسالة نسمة او تقوم تحكم العالم
