.صباح الخير عليك.
صباح الخير عليك
صحيت غسلت وشك
فقت وأخذت دشك
صبحت على ولادك
فطرت واخذت فنجانك
نزلت وركبت عربيتك
ولا رحت ركبت اتوبيسك
عشرات السيارات حواليك
الاف البشر قدام عنيك
اللى رايح على شغله
واللى بيفتح دكانته
واللى بيرص بضاعته
واللى بينادى على رزقه
الطريق زحمه شويه
دى فتحات لمواسير الميه
وده اساس لكبارى علويه
ودى عواميد كهربا تقويه
ودى اوناش انفاق أرضيه
ودى مبانى مشاريع سكنيه
واستصلاح اراضى زراعيه
ودى احواض مزارع سمكيه
أخيرا وصلت شغلك
فطرت وخلصت عملك
شويه وفتحت جرنالك
شفت حال الدنيا وحالك
قتلى وجرحى ف سوريا
غاز كيماوى
قتلى وجرحى فالعراق
هجوم انتجارى
قتلى وجرحى فاليمن
قصف جوى
قتلى وجرحى ف ليبيا
هجوم بري
خراب ودمار فكل مكان
حاله تبكى……
…… …. …..
طبقت جرنالك
شفت حالهم من حالك
عدى على خير يومك
روحت بسلامه لولادك
شايل ومحمل من خيرك
وبتشتكى الفاكهة نار
واللحمه اسعارها نار
فعلا الحاجه غاليه نار
بس نار ارحم من نار
الاسعار احنا اللى عملينها
شوية تجار فالزحمه واكلينها
الرحمه راحت والزمه خربينها
وان جت عالفاكهة بلاش منها
اسعارها تنزل احنا اللى رافعينها
أما نار الحروب ياويلك منها
بلاد حوالينا بالنار شاعلينها
طاعون وانتشر ف قلب سكانها
وحوش مش بشر نهشوا فاركانها
بس ربك عالم بالحال يا جنتله
أحنا مش حمل فوضى وبهدله
وأن كان عالاسعار والغلا
بأدينا نقدر نسوى المسئله
شوية نظام ووعى ومرجله
شوىة دراسه وفهم المشكله
شوية ضمير تتحل المعضله
…… … …. ……
وصباح الخير عليك
………………………….
