من نعم اللة علينا اننا نمتلك الموقع الجميل الذى يتوسط الكرة الارضية والجو الرائع والارض الخصبة ولاينقص بعضنا سوى……..الضمير
ياناس راعوا ضميركم حرقتم دمنا
كفاية بقى عمايلكم سودتم وشنا
مش خايفين نحاسبكم طب خافوا ربنا
………………. ….. …………..
ودة موظف حكومة ولا صاحب تكية
الناس معاة مظلومة يوماتى رايحة جاية
دواليب باوراق مزحومة من مدة زى ماهية
……….. ….. ….. ………
وحاجتك تمشى بواسطة
ياتفتح درج الاسطى
ياتجيب ميت ورقة بوسطة
……………………………
ياناس راعو ضميركم
…………………………………
ودة مدرس لو يندهلك انت ياحمار ياكبير
من بكرة ولى امرك يجى مكتب المدير
يابية احب درسك. تعالالى ياواد يا امير
……….. ……………. ………..
والحصة يقلبها اثنين
والصفحة عايزة شهرين
والغدا عند ام امين
……………………………
ياناس راعوا ضميركم
……………………………………
ودة تاجر فاكهة كبير راشق فكل المزايدات
ومعاة شوية طراطير داخلين حبة زهورات
وعلية ترسى المشاوير بالرشوة وبالهديات
……… ……….. ………………..
ويعلى على البياعين
والجنية يلمة عشرين
وما بينهم احنا ضايعين
…………………….
ياناس راعوا ضميركم
……………………
ودة الدكتور الدولى فى جميع التخصصات
نسا باطنى كلوى عظام عيون جراحات
عادى مستعجل فورى يدفع حتى لو مات
……………………………..
والكشف فى دقيقتين
ومعاة عشرة داخلين
مولد شى لله ياحسين
…………………………..
ياناس راعوا ضميركم
………………………….
ودة صحفى محنك ذمتة عال العال
طول ما راضى عنك يرقعك كام مقال
ولما تخف يدك بلاوى عليك تنهال
…………….. …… ………
وياتدفع لة شهرية
يا تقب كل شوية
بشقة او عربية
………………………….
ياناس راعوا ضميركم
………………………………….
ودة محامى يقرشلك البحر كلة طحينة
ويقولك مش هاغشك قضيتك مضمونة
وسنين ياكل فكرشك ويدورك فطاحونة
……… ……… ………………
وهات لرفع الدعوات
وهات لحضور جلسات
واخيرا الموكل مات
…………………..
ياناس راعوا ضميركم
……………………….
ودة اعلامى اسطورة والشهرة مطبلاتى
طول مانت فالصورة معاك مغنواتى
ولما يشطوك بالكورة يقلب مشردحاتى
…………… …… ……………..
ويقطع فى ا لسابقين
ويمسى عالحاضرين
وبكرة الدور على مين
………………………………
ياناس راعوا ضميركم
……………………………….
ودة ناشط سياسى حقوقى وخريج لمان
وزى مانت راسى بينط فى كل مكان
كلامة وجع راسى عيش حرية امان
………….. …….. ……….
ويردح فى النداوات
ويميل على الخوجات
ويلم فى الدولارات
………. ……….. ………..
ياناس راعوا ضميركم
……………………..
